Gleðileg Jól!!
Jólin hjá okkur voru með frekar óvenjulegum hætti í ár… Óvenjulegi hlutinn var hin sískemmtilega pest sem veldur uppköstum, niðurgangi og hrikalegri vanlíðan. Ása Júlía byrjaði á þorláksmessumorgun að kasta upp, ég tók við um miðjan dag (Í vinnunni!). Á Aðfangadagsmorgun tók Oliver svo við. Við ákváðum að taka stöðuna á Leifi, sem var farinn að finna fyrir óþægindum, um hádegi hvort við ættum yfir höfuð að fá foreldra mína í mat um kvöldið … Ég stakk upp á náttfatajólum með léttmeti, pökkum og sjónvarpsglápi en Leifi fannst það ekki hægt og taldi sig vera nógu sprækan til að taka á móti jólunum í öllu sínu veldi…
Um það leiti sem maturinn kom á borðið féll Leifur fyrir pestinni og eyddi kvöldinu með pestinni.
Yndislega jólastelpan mín var svooo slöpp eftir herlegheitin að hún sofnaði í fanginu á mér í sófanum… nýkomin úr fínu jólafötunum sínum og í náttfötin sem hún fékk í morgun.
Við fengum fullt af fallegum gjöfum og jólakveðjum og þökkum kærlega fyrir okkur. En eins og alltaf eru ákveðnar gjafir sem standa uppúr hjá manni og í ár eru þær 3. 
Oliver föndraði þessa fínu leirskál í skólanum ásamt 2 jólaskrauti. Ása Júlía hannaði og saumaði þennan glæsilega Snjófroskabangsa í leikskólanum og Sigurborg Ásta handstimplaði þetta fína fína kertaglas hjá dagmömmunum.